TIRANË- Bashkia e Tiranës hedh poshtë deklaratat e Partisë Demokratike se tek parku i Liqenit do të ndërtohet një bar-kafe pranë këndit të lojërave.
“Bashkia e Tiranës deklaron se në projektin e parkut të lojërave për fëmijë nuk parashikohet asnjë ndërtim kafeneje apo restoranti, siç pretendojnë ata që e shkatërruan Tiranën në 4 vitet e fundit. Ky projekt fantastik përfshin vetëm një park lojërash për fëmijët e të moshave dhe nuk cenon absolutisht asnjë pemë të Parkut të Liqenit”, thuhet në njoftim.
“Ata që e shkatërruan Tiranën për 4 vjet, duke dhënë leje ndërtimi për pallate 17 katëshe m’u te diga e Parkut të Liqenit, e kanë të lehtë të baltosin sot ata që punojnë, duke u përpjekur të pengojnë zhvillimin e mëtejshëm të Tiranës. Qytetarët e Tiranës e kanë fare të qartë se kush e ka shkatërruar Parkun e Liqenit, duke lejuar ndërtimin e dhjetëra kafeneve dhe restoranteve rreth e rrotull parkut”, vijon Bashkia.
Në përgjigje të deputetes Jorida Tabaku, Bashkia e Tiranës thotë: “Kemi vetëm një kërkesë për të gjithë përtacët që e drejtuan qytetin e Tiranës nga viti 2011 në 2015: Na lini të punojmë! Qytetarët e Tiranës duan punë dhe jo llafe kafenesh. Qyteti i Tiranës ka nevojë të zhvillohet e të shndërrohet në një metropol evropian”.
PD: Pas lodrave tek Liqeni fshihet bar-restoranti i mikut të Veliajt
