Kryetari i LDK, Isa Mustafa ka reaguar pas pretendimeve të deputetit të Lëvizjes Vetëvendosje, Gazmend Gjyshnica se është sulmuar fizikisht në korridoret e parlamentit nga dy deputetët Arben Gashi e Kujtim Shala.
Në një status në Facebook, Mustafa thotë se pretendimet janë të improvizuara dhe në mënyrë ironike shprehet se “Akademik Shala mund ti rrahë me dije e me argumente prej të parit deri në të fundit të VV-së”.
“Kështu është, kur nuk e kupton gjuhen intelektuale të Akademikut Kujtim Shala. Nuk ke kapacitet të mendosh dhe ta kuptosh se çfarë tha dhe thua me rrahu Kujtimi.
Akademik Shala mund ti rrahë me dije e me argumente prej të parit deri në të fundit të VV-së dhe të gjithë së bashku. Ai ka dije e mendjehollësi; ka më shumë libra të botuara sesa VV-ja deputetë.
Frikësohem se nëse deputetët e VV-së i lexojnë librat e Kujtimit dhe nuk i marrin vesh, pasi janë vetëm zhurmues, do ta thërrasin një helikopter, jo makinë të ndihmës së shpejtë, para ndërtesës së Kuvendit.
Deri sot i kanë bërë të gjitha të zezat, e sot improvizojnë se i sulmuan deputetët e LDK-së, sepse duan të luajnë rolin e viktimës.
Tani po pres, që ndonjë diplomat i jashtëm, përkëdhelës i VV-së, të ma sjell një “demarsh” në LDK; ata që u mërzitën shumë kur e prishëm koalicionin me VV-në?! IM”, shkruan kreu i LDK-së. /Opinion.al
