Mbrëmjen e djeshme, pas tubimit përpara zonës së quajtur “Torrës Veneciane”, me motivin ndalimin e gërmimeve në zonën arkeologjike A në Durrës, nisi një konflikt që degjeneroi në përplasje fizike midis dy grupimeve shoqëri civile-Lëvizja Studentore.
Policia e Durrësit theksoi se konflikti ka nisur midis shtetasve A.J. 29 vjeçe, banuese në Elbasan dhe L.B. 35 vjeç, banues në Tiranë, pjesë të Shoqërisë Civile dhe shtetasve E.K. 33 vjeç, dhe G.J. 25 vjeç, banues në Tiranë, pjesë e Lëvizjes Studentore.
Mësohet se dy nga shtetasit kanë marrë dëmtime të lehta dhe pas ndihmës mjekësore në Spitalin Rajonal Durrës shkuan në banesa.
Sipas policisë, protesta zhvillohej nga një grupim i Shoqërisë Civile, të cilët kërkuan për mbështeteje një grup studentësh ‘Lëvizja Studentore e formuar për mbrojtjen e sistemit të vlerave dhe kundërshtimin e pseudo-shtetarëve, në funksion të kundërshtimit të projektit’, ‘Veliera”.
Nga i njëjti burim, tregohet se Lëvizja Studentore pretendon se nuk është përmbushur kushti që palët kishin rënë dakort, se në protestë nuk do të kishte thirrje politike (ata pretendojnë se Shoqëria Civile ka pasur veshje me stema dhe emblema të Partisë Demokratike).
Protesta nisi në orën e caktuar dhe vijoi në mënyrë paqësore deri në orën 22:30, kohë kur midis dy grupeve të mësipërme pati konflikt.
Policia e Durrrësit nisi procedim penal në gjendje të lirë ndaj tyre dhe materialet për veprime të mëtejshme janë referuar në Prokurorinë e Rrethit Gjyqësor Durrës për veprën penale ”Dëmtime të tjera me dashje”,parashikuar në nenin 90 të Kodit Penal.
