Një sherr si në filma mes dy presidentëve të futbollit. Ngjarja ndodhi pranë rreth-rrotullimit tek ish-Shqiponja të mërkurën, ndërsa Presidenti i Tiranës, Refik Halili kishte lënë takim me presidentin e Laçit, Pashk Laska për tu sqaruar pas dhunës në ndeshjen e Superligës në “Selman Stërmasi”.
Sapo Halili ka mbërritur me automjetin e tij, i është kërkuar të hapë xhamin dhe më pas është goditur me një send të fortë nga Pashk Laska, aq sa thuhet se ka çarje në ballë.
Pas kësaj, njerëz të Halilit dolën nga makina dhe sulmuan presidentin kurbinas, duke e goditur disa herë.
Policia ndërhyri më pas, ndërsa mësohet se të dy presidentët bënë denoncim për njëri-tjetrin. Tashmë, ka nisur një hetim për të zbuluar sesi ndodhi ngjarja.
Konflikti i rëndë pas ndeshjes së Kupës, pason dhunën që ndodhi në përfundim të sfidës së Superligës në korridoret e “Selman Stërmasit”, ku presidenti laçian, Laska dhe lojtari i Tiranës, Michael N’go, tentuan konflikt fizik me njëri-tjetrin dhe ku djali i Laskës goditi futbollistin./Opinion.al
