Mbrëmjen e djeshme u raportuan të shtëna me armë në një lloto sport në rrugën Bardhyl në Tiranë. Policia tha sot sherri mes 7 personave ka ndodhur për motive banale. Eshtë arrestuar Sandër Dapaj, 37 vjeç, banues në Tiranë, ( i dënuar më parë), i cili është kapur në flagrancë në vendngjarje me armë zjarri të llojit “Beretta”. Sipas policisë, 37 vjeçari ka qëlluar 6 herë në ajër. Në kërkim është shpallur pronari i lokalit K. S., 44 vjeç, banues në Tiranë.
Sipas policisë në lokalin e llotove ka ndodhur një konflikt për motive të dobëta mes dy grupeve, pronari i lokalit dhe Sander Dapaj përballë shtetasve G.S, 35 vjeç, E. O., 35 vjeç (i dënuar më parë ), Sh. F., 32 vjeç, E. B., 36 vjeç dhe O. Xh., 46 vjeç , të gjithë banues në Tiranë.
Si pasojë e konfliktit Sandër Dapaj, ka qëlluar në ajër me armë zjarri të llojit “Beretta”.
Gjatë kontrollit të ushtruar në lokalin e basteve ( në pronësi të shtetasit K.S., 44 vjeç) i cili rezultoi pa licencë, janë gjetur dhe sekuestruar njësi kompjuteri për vendosjen e basteve sportive dhe televizora plazma.
Sekuestrohen në cilësinë e provës materiale :
– armë zjarri e llojit “Beretta”
– 6 gëzhoja
– 4 televizorë plazma
– 2 njësi kompjuteri
Vijon puna për identifikimin e personave të tjerë të përfshirë në këtë ngjarje.
Materialet ju referuan Prokurorisë së Rrethit Gjyqësor Tiranë në ngarkim të shtetasve S.D., dhe K.S., për veprat penale “Prodhim dhe mbajtja pa leje e armëve luftarake”, “Prishja e qetësisë publike”, “Organizim i llotarive të palejuara” dhe “Vënia në dispozivion e lokaleve për lojëra fati”, parashikuar nga nenet 278, 274, 197 e 198 të Kodit Penal, ndërsa për shtetasit G.S., E.O., Sh.F., E.B., dhe O.Xh., për veprën penale “Prishjes e qetësisë publike”, parashikuar nga neni 274 i Kodit Penal. /Opinion.al
