Përplasja në ministritë, të cilat i janë lënë në administrim ministrave teknikë sa vjen dhe thellohet.
Një ditë më parë, Ministrja e Financave, Helga Vukaj firmosi urdhërin ku kërkonte ndërprerjen e pushimeve vjetore për të gjithë punonjësit, deri në datën 30 Qershor, që të shmangej dalja e tyre në fushatë.
Por e menjëhershme ka qenë edhe përgjigjja e Zv/ministres së Financave, Irena Beqiraj, e cila e konsideron urdhrin të jashtëligjshëm.
Helga Vukajt i ka mbërritur kjo memo, e siguruar nga Televizioni Klan, ku kërkohet reflektim për urdhrin e parë. Në memo shkruhet se nuk është përgjegjësi e Ministres, menaxhimi i Burimeve Njerëzore, por e drejtuesit më të lartë civil, në këtë rast Sekretarit të Përgjithshëm.
“Ministri është përgjegjës për drejtimin e politikës shtetërore të Ministrisë që ai drejton dhe nuk ka kompetencë për të vepruar në lidhje me administrimin e Burimeve Njerëzore”, thuhet në shkresë.
Memoja i përmend pozicionin dhe fuqinë që Ministri ka mbi kategorinë e lartë drejtuese dhe jo mbi stafin teknik.
Shkresa mbyllet duke i kërkuar Ministres, që të qëndrojë e distancuar nga administrata publike dhe funksionimi normal i saj dhe kjo thuhet në këtë letër, nuk sigurohet nga nxjerrja e urdhërave në kundërshtim me ligjin.
Por menjëherë pas kësaj shkrese, Helga Vukaj ka firmosur kallëzimin penal për Kliton Bistrin, Inspektor i Hetimit Tatimor.
Ai dyshohet se ka marrë pjesë në fushatë gjatë orarit të punës dhe sipas njoftimit të Ministrisë së Financave është në kundërshtim flagrant me ligjet në fuqi dhe urdhërin e Kryeministrit.
Vetë kreu i qeverisë tha gjatë një aktiviteti në Lezhë tha se administrata është e lirë të marrë pjesë në fushatë jashtë orarit zyrtar.
Deri tani janë bërë disa shkarkime të punonjësve të administratës. Disa ditë më parë Ministri i Drejtësisë shkarkoi Drejtorin e Burgjeve në Tropojë, për përfshirje në fushatën zgjedhore. /Tv Klan
