Një sherr mes tre personash është regjistruar pesë ditë më parë në Tiranë.
Policia bën me dije se në datën 31 Mars shtetasi Henri Gjapi është konfliktuar me 46-vjeçarin Gentian Talja, ndërsa gjatë konfliktit është përfshirë edhe një tjetër person 41-vjeçari Artur Gjolena.
Si pasojë e sherrit ka mbetur i lënduar 46-vjeçari Gentian Talja, i cili është dërguar për ndihmë të specializuar mjekësore në spital.
Policia informon se 46-vjeçari nuk ka mundur t’iu mbijetojë plagëve të marra dhe ka ndërruar jetë në spital ditën e djeshme, katër ditë pas sherrit.
Uniformat blu vijojnë punën për kapjen e shtetasit Henri Gjapi.
“Specialistët për Hetimin e Krimeve të Komisariatit të Policisë Nr. 2 kanë referuar materialet në Prokurori, për shtetasin Artur Gjolena 41 vjeç, dhe kanë shpallur në kërkim shtetasin Henri Gjapi, 25 vjeç, të dy banues në Tiranë.
Kjo pasi “më datë 31.03.2023, në rrugën “Vaso Pasha”, shtetasi Henri Gjapi është konfliktuar me shtetasin Gentian Talja, 46 vjeç, i cili për shkak të dëmtimeve është dërguar në spital, për ndihmë mjekësore. Gjatë këtij konflikti, ka ndërhyrë edhe shtetasi Artur Gjolena i cili ka goditur shtetasin Henri Gjapi. Si pasojë e dëmtimeve, 46-vjeçari ka ndërruar jetë në spital, ditën e djeshme”-njofton policia.
