Një ngjarje e rëndë është shënuar mbrëmjen e djeshme në Greqi.
Një shqiptar ka mbetur i plagosur me thikë pas një sherri me një bashkatdhetar të tij.
Sipas mediave greke, konflikti mes tyre ka ndodhur në Heraklion, rreth orës 9. Konflikti fillimisht ka nisur në një lokal që ndodhet në një rrugë qendrore të qytetit.
Pas përplasjes në ambientet e lokalit, sherri mes tyre ka vazhduar edhe në rrugë, ku 30-vjeçari shqiptar është goditur me thikë në pjesë të ndryshme të trupit.
Sakaq mësohet se shqiptari tjetër është identifikuar dhe është shpallur në kërkim nga policia.
30-vjeçari mësohet se është plagosur rëndë dhe është dërguar në spital, ku iu nënshtrua një operacioni dhe është në gjendje kritike për jetën.
