Presidenti i Tiranës, Refik Halili ka denoncuar në polici presidentin e Laçit, Pashk Laska, me pretendimin se ky i fundit e ka goditur. Ngjarja ka ndodhur gjatë ditës së sotme në Tiranë, në një lokal në dalje të kryeqytetit.
Sipas burimeve, edhe pse kishin lënë takim aty, situata është tensionuar. Ndërsa në orët e mbrëmjes ka ardhur edhe denoncimi i Halilit. Po ashtu mësohet se presidenti i Laçit është shoqëruar në polici.
Ndërkohë të shtunën, nga kamerat e sigurisë së stadiumit “Selman Stërmasi” u mësua se si nisi sherri mes sulmuesit të Tiranës Michael N’Goo dhe lojtarëve dhe pjesëtarëve të stafit të Laçit.
Duket se fillimisht N’Goo konfrontohet verbalisht me presidentin e klubit kurbinas, Pashk Laska, e më pas afrohet për ta goditur. Në këtë moment kanë ndërhyrë edhe të tjerët dhe më pas situata është përshkallëzuar.
Njoftimi i policisë
Shërbimet e Policisë të Komisariatit Nr.6, proceduan penalisht në gjëndje të lirë shtetasit R. H., dhe P. L. Procedimi ndaj këtyre shtetasve filloi pasi, në zonën e ish-doganës së vjetër, pranë sheshit “Shqiponja” janë konfliktuar fizikisht me njëri-tjetrin. Materialet i kaluan për veprime të mëtejshme Prokurorisë së Rrethit Gjyqësor Tiranë në ngarkim të shtetasve të lartpërmendur për veprën penale “Dëmtime të tjera me dashje”, parashikuar nga neni 90 i Kodit Penal. /Opinion.al
