Një person nën efektin e alkoolit ka sulmuar me thikë katër persona të premten në darkë në qytetin e Elbasanit.
Ngjarja ka ndodhur në lagjen “Syrja Dylgjeri” ku autori i kësaj ngjarje i identifikuar si G.Sh, është konfliktuar fillimisht me dy persona në rrugë dhe më pas i ka qëlluar me thikë.
Për të shuar konfliktin kanë ndërhyrë edhe dy persona të tjerë, të cilët gjithashtu janë goditur me thikë nga i dehuri.
Të plagosur kanë mbetur E.Ç., 44 vjeç, Z.Ç., 19 vjeç, A.S., 42 vjeç dhe U.S., 18 vjeç banues në Elbasan, të cilët janë transportuar me urgjencë në spital dhe mësohet se ndodhen jashtë rrezikut për jetën.
Ngjarja ka ndodhur në një zonë mjaft të frekuentuar në Elbasan. Autori i plagosjes është shpallur në kërkim nga policia dhe vijon puna për kapjen e tij.
