Një konflikt me armë ka ndodhur në Shkodër ditën e sotme, ku tre persona janë përplasur me njëritjetrin.
Policia ka arritur që të parandalojë përshkallëzimin e situatës dhe ka arrestuar dy prej të përfshirëve në sherr. Gjithashtu, është shpallur në kërkim një i tretë.
Të arrestuarit janë Prekë Miri dhe K.P. të cilët kanë kanosur me armë zjarri shtetasin 54vjeçar, S.S. Mësohet se ngjarja ka ndodhur për motive të dobëta.
Njoftimi i Policisë
Më datë 9.08.2016 është njoftuar Salla e Komandimit të Komisariatit Shkodër, se mes shtetasve Prekë Miri , shtetasit K.P dhe shtetasit S.S ka konflikt dhe përdorim të armëve të zjarrit.
Menjëherë nga forcat policore është vlerësuar maksimalisht situata, janë marrë masa të menjëhershme dhe pas verifikimit është konstatuar se shtetasi Prekë Miri së bashku me K.P për motive të dobëta kanë kanosur me armë zjarri shtetasin S.S, 54 vjeç, banues në Shkodër.
Nga këqyrja e vendit të ngjarjes u gjetën dhe u sekuestruan në cilësinë e provës materiale : 7 gëzhoja model 56, një fishek model 56 si dhe një kapak i kutisë së tytës së një arme zjarri. Materialet për këtë hetim i përcillen Prokurorisë së Rrethit Gjyqësor Shkodër për ndjekje.
