Në fund të Janarit, kreu i gjigandit të telekomunikacionit AT&T, Randall Stephenson zbuloi se kompania planifikon që t’i ofrojë përdoruesve hotspot-e 5G, përpara se telefonat që mund ta përballojnë shpejtësinë e re të internetit të dalin në treg.
Por rezulton se kjo nuk është e vetmja kompani që planifikon të bëjë një gjë të tillë.
Sipas asaj që shkruan Bloomberg, edhe Verizon po planifikon që të hedhë në treg hotspot portabël 5G këtë vit, për të gjithë ata që janë të paduruar. Në një intervistë në Mobile World Congress, kreu i departamentit të wireless-it, Ronan Dunne tha:
“Do të prisja një gamë të gjerë pajisjesh në 2019-ën dhe disa prej tyre që në gjysmën e parë të vitit. Nëse do të jetë e mundur diçka në 2018-ën, ato me gjasë do të jenë hotspot-et”.
Bloomberg nuk jep më shumë detaje, megjithatë nuk është e habitshme që të dyja këto kompani të nxjerrin një pajisje që do të mund t’i japë përdoruesve mundësinë të përdorin 5G-në.
Si AT&T ashtu edhe Verizon pritet që ta ofrojnë këtë shërbim brenda këtij viti. Në rastin e AT&T, kjo linjë tepër e shpejtë interneti, pritet që të jetë e prekshme në 12 qytete.
Problemi qëndron që për ta përdorur, duhen telefona që e përballojnë këtë shpejtësi.
Teksa Huawei po punon për një telefon 5G me qëllimin që ta hedhë në treg para të gjithëve, të dyja kompanitë e shërbimit telefonik hoqën dorë nga bashkëpunimi, për shkak të shqetësimit se kjo mund të përdorej nga qeveria kineze për spiunim.
Edhe ZTE po punon për telefonin e saj 5G, por nuk do të jetë gati deri në fund të 2018-s.//tvklan.al
