Gjermania përmbysi rezultatin në minutën e 95 duke fituar ndaj Suedisë, 2-1 me një gol të mrekullueshëm të shënuar nga Kroos.
Gjermanët zhvilluan një pjesë të parë të mirë, në ndryshim nga takimi me Meksikën, por megjithatë ishin suedezët ata që arritën të shënojnë. Ishte minuta e 32 kur Toivonen arriti të mposht Neur, duke e dërguar topin në rrjetë.
Ndërkohë, menjëherë me të nisur pjesa e dytë, gjermanët reagojnë dhe arrijnë të gjejnë golin e barazimit me anë te Reus.
Gjithçka u bë edhe më e vështirë për gjermanët kur Boateng u ndëshkua me kartonin e kuq në minutën e 82.
Por sërish gjermanët nuk u dorëzuan dhe në minutën e 87 patën shansin e artë kur Gomez goditi me kokë pranë portës, por në limite portieri i Suedisë arriti të largojë atë në këndore.
Kur të gjithë i kishin humbur shpresat dhe po luheshin sekondat e fundit, Toni Kroos realizon një kryevepër që do të mbahet mend gjatë nga të gjithë gjermanët, duke e dërguar topin në rrjetën e Suedisë nga një goditje dënimi.
