Ish-kryeministri Sali Berisha ka uruar Kombëtaren Shqiptare të futbollit, pasi mundi Poloninë në një ndeshje spektalore në “Air Albania”.
Përmes një postimi në rrjete sociale, Berisha kujton se Mirlind Daku, golashënuesi i dytë në fitoren me Poloninë, mban në shpatull tatuazhin “Katana 138” pseudonimin e heroit të kombit Agim Ramadani.
“Mirlind Daku, autori i super golit të dytë në fitoren me Poloninë mban në shpatull tatuazhin “Katana 138,” pseudonimi i heroit të kombit, Agim Ramadani, komandanti i Brigatës 138 i betejës në Koshare.
Edhe njëherë një përshëndetje të përzemërt Mirlind Dakut dhe Jasin Asanit, për golat e tyre fantastik, të gjithë ekipit të Kombëtares, kapitenit Berat Gjimshiti, dhe udhëheqësit brilant të ekipit Sylvihno, që me super fitoren e djeshme po ecin drejt Zenitit!”, shkruan Berisha.
“Katana” ka qenë pseudonimi i një prej komandantëve më të shquar dhe më aktivë të Ushtrisë Çlirimtare të Kosovës, Agim Ramadani. Ramadani ka qenë edhe komandant i zonës së Kosharës.
Më 1 Prill 1999, “Katana” ra dëshmor gjatë një luftimi ballë për ballë me forcat serbe. Ai mori pjesë në Betejën e përgjakshme të Koshares e cila u zhvillua në Prill të vitit 1999.
Beteja e Koshares njihet edhe si beteja ku u thye kufiri. Në shenjë simbolike, Ushtarët e UÇK-së rrëzuan gurin e kufirit që ndante Kosovën me Shqipërinë. Prandaj edhe në tatuazhin e Dakut është pikturuar edhe një këmbë me një piramidë të rrëzuar të kufirit.
Në këtë betejë, ushtria jugosllave e humbi kontrollin e kufirit Kosovë-Shqipëri, e cila ishte një fitore e madhe për Ushtrinë Çlirimtare të Kosovës, duke i detyruar ushtarët serbë të largohen nga kufiri dhe duke e mundësuar kalimin e sigurt të armëve dhe vullnetarëve nga Shqipëria për në Kosovë.
Ramadani ishte komandant i “Brigadës 138” deri në ditën e rënies së tij. Pas përfundimit të luftës ai u shpall Hero i Kosovës./Opinion.al
