Kryeministri Edi Rama dhe kreu i PD, Lulzim Basha, kanë përkujtuar sot 5 -vjetorin e shpalljes shenjtore të Nënë Terezës.
Në një postim në rrjetet sociale, Rama ka publikuar një video me thëniet e çmuara të Nënë Terezës, përmes zërit të aktores së mirënjohur, Margarita Xhepa.
“Mirëmëngjesi dhe me këtë videokujtesë në Ditën e Shenjtërimit të gruas që u njehsua me dashurinë e Zotit, Nënë Terezës shqiptare, treguar me zërin margaritar të një zonje shqiptare të skenës, Margarita Xhepës, ju uroj një të diel të paqtë”, shkruan Rama.
Ndërsa, kreu i Partisë Demokratike Lulzim Basha ka përkujtuar ditën e Shenjtërimit të Nënë Terezës duke e cilësuar si ditë krenarie dhe reflektimi.
“Kremtimi i Shenjtërimit të Nënë Terezës është një ditë krenarie kombëtare dhe reflektimi. Mënyra më e mirë për ta nderuar Shën Terezën është shndërrimi i misionit të saj në misionin tonë, i shembullit të saj në frymëzim dhe nxitje për të bërë më shumë dhe me përulësi për ata që janë në nevojë e pa mbështetje, të braktisurit e të sëmurët, për të sjellë shpresë për një jetë më të mirë për gjithë të rinjtë dhe të rejat që si të vetmen zgjidhje shohin emigracionin, me besimin se edhe në ditët më të vështira, e mira triumfon gjithmonë mbi të keqen”, shkruan Basha./Opinion.al
