Aktualisht është duke u zhvilluar takimi informal mes Kryeministrit Rama, Presidentit serb Vuçiç dhe Kryeministrit maqedonas Zaev në kuadër te Mini-Shengenit.
Por ndërkohë që liderët politik po zhvillojnë takimin në Bulevard ka nisur një protestë e aktivistëve të Lëvizjes Vetëvendosje dega Tiranë.
Mësohet se protesta ka nisur me përplasje pasi policia i ka shtyrë dhe larguar disa metra larg protestuesit. Liderët e vendeve të Ballkanit Perëndimor sot dhe nesër zhvillojnë në Tiranë në takimin e tretë rajonal mes këtyre vendeve. Por, në këtë takim nuk do të jetë e pranishme Kosova.
Kryeministri Rama është një mbështetës i fortë i këtij procesi. Mbrëmjen e djeshme ai theksoi se ky projekt është një mundësi e artë për Shqipërinë dhe Kosovën që të heqin kufirin mes tyre dhe shtoi se mospjesëmarrja e kësaj të fundit e nxjerr humbëse politikën e Kosovës në sytë e vëllezërve amerikanë.
Takimi në Tiranë vjen pas dy takimeve të mëparshme të zhvilluara në Novi Sad të Serbisë dhe në Ohër të Maqedonisë së Veriut. Kosova e ka refuzuar pjesëmarrjen edhe në dy takimet paraprake. Me mbledhjen në Tiranë mbyllet cikli tripalësh i takimeve të liderëve të Ballkanit Perëndimor dhe pritet që ata të dalin me një vendimmarrje në lidhje me këtë proces. /Opinion.al/
