Suksesi i dukshëm i Zelandës së Re në përballimin e virusit i është atribuar veprimeve të hershme dhe gjithëpërfshirëse. Nga mbyllja e kufijve tek izolimi i shpejtë, ja cfarë hapash mori konkretisht Zelanda e Re.
Mbylli kufijtë
Zelanda e Re bëri disa nga kufizimet më të ashpra në botë për udhëtime dhe aktivitete që në 19 Mars. Kjo ndihmoi në ndalimin e rasteve të sjella nga jashtë, vetëm 33% e rasteve të Zelandës së Re u importuan.
Siç tha kryeministrja Jacinda Ardern në atë kohë: “Ne kemi vetëm 102 raste, por kaq kishte dhe Italia fillimisht”.
“Nëse shikoni Australinë fqinje, dy të tretat e rasteve të saj vinin nga jashtë,” i tha BBC-së Prof Sanjaya Senanayake nga Universiteti Kombëtar Australian. “Pra, ishte vërtet e rëndësishme mbyllja e kufinjve.”
Bëri një izolim të shpejtë dhe të qartë
Më 21 mars, Zelanda e Re prezantoi një sistem të ri të paralajmërimit publik me katër nivele, më i larti ishte izolimi i plotë kombëtar dhe më i ulëti që tregon se sëmundja ishte e përmbajtur, por njerëzit duhet të ishin të përgatitur.
Shteti hyri në nivelin e dytë, që do të thoshte se kishte një rrezik në rritje të transmetimit të virusit në komunitet. Disa ditë më vonë, vendi u zhvendos në nivelin katër.
Zyrat, shkollat dhe hapësirat publike si plazhet dhe sheshet e lojërave ishin mbyllur. Baret dhe restorantet gjithashtu ishin të mbyllura përfshirë dhe shërbimet “delivery”.
Gjurmoi dhe testoi
Ministria e Shëndetësisë tha se 80% e kontakteve të ngushta të personave të konfirmuar me virusin janë testuar brenda 48 orëve nga diagnostikimi.
Zyrtarët thanë se 8,000 njerëz po testohen çdo ditë.
Mesazhe të qarta publike
Qeveria gjithashtu është lavdëruar për qartësinë e mesazheve të saj gjatë gjithë krizës.
“Unë mendoj se kur dëgjon kryeministren që jep informacione sensitive në mënyrë të qetë, kjo gjithashtu ju ndihmon të ndjeheni të qetë”, tha Prof Senanayake.
Por ai doli kundër heqjes së kufizimeve shumë herët, duke thënë se njerëzit prapë duhet të “mbeten vigjilentë”.
“Mënyra e vetme për ta bërë këtë është të vazhdosh mbikëqyrjen dhe testimin e zgjeruar. Sot kufizimet kanë rënë, por nëse rastet rriten, duhet të konsiderohet kthimi i kufizimeve. Është diçka për të cilën duhet të jesh vigjilent”, u shpreh ai për BBC./Opinion.al
