Deputeti i Kuvendit të Shqipërisë, Tom Doshi, ka reaguar ashpër për prishjen e shtëpisë së heroit antikomunist Prek Cali në Malësinë e Madhe.
Përmes një shënimi në “Facebook”, Doshi ka theksuar se ky është një akt barbar dhe shprehje e urrejtjes ndaj qëndrestarëve antikomunistë si Prek Cali.
Doshi shkruan se ndjen një keqardhje të veçantë për mundin e komunitetit shqiptar të Amerikës që kontribuan financiarisht për punimet që ishin bërë deri dje dhe për një gjest të tillë, u kërkon falje të gjithë shqiptarëve.
“Pikërisht ata që duhej ta kishin mbrojtur shtëpinë e prijësit dhe të mbrojtësit të tokave shqiptare, heroit Prek Cali, e rrafshuan edhe atë pak gjë që kishte mbetur në këmbë”, thekson Doshi.
Sipas tij, ku akt barbar turpëron ata që i kanë marrë votat malësorëve dhe tregon se urrejtja ndaj qëndrestarëve antikomunistë si Prek Cali nuk ka fund.
Ndërkaq, Tom Doshi, njëkohësisht edhe i afërm i Prek Calit, premton se kulla do të ndërtohet ashtu siç edhe ka qenë dikur. Ai shkruan se askush nuk mund t’a mposhtë kujtimin e atij burri të kombit.
“Unë vetë si kushëri i tij, si deputet dhe si qytetar, ju jap fjalën që shtëpia e Prek Calit do të ndërtohet trekatëshe për Vitin e Skënderbeut”, premton ai.
