Ndërsa ka njoftuar një protestë nesër në orën 16:30, Aleanca për Mbrojtjen e Teatrit, pritet të ndërmarri edhe nisma ligjore lidhur me shembjen e godinës.
Gazetarja Klodiana Lala ka raportuar se janë bërë gati dy padi të cilat do të dërgohen në SPAK. Sipas Lalës, njëra prej padive i adresohet Ministres së Kulturës, Elva Margariti dhe drejtorit të Teatrit Kombëtar, Hervin Çuli për shpërdorim detyre, pasi nuk është bërë inventari i sendeve dhe kostumeve brenda teatrit para se ai të shembej.
Ndërkohë një kallëzim i dytë pritet të dërgohet në SPAK për Ministrin e Brendshëm, Sandër Lleshaj, Drejtorin e Përgjithshëm të Policisë së Shtetit, Ardi Veliu dhe zyrtarë të tjerë të policisë, me arsyetimin se në kundërshtim me ligjin ata kanë ushtruar dhunë ndaj protestuesve. Akuza tjetër është “vrasje me dashje e mbetur në tentativë” vepër që sipas Aleancës, është konsumuar kur është goditur teatri, pasi një pjesë e aktorëve ishin brenda godinës./Opinion.al
