Një ndërtesë banimi është shembur si pasojë e një shpërthimi në Marsejë, duke plagosur të paktën pesë persona, ndërsa autoritetet në qytetin francez thonë se deri në 10 të tjerë mund të jenë nën rrënojat e djegura.
Në momentin e shpërthimit rreth orës 12:40 të së dielës, “gjithçka u trondit, mund të shihje njerëz që vraponin dhe kishte tym kudo, ndërtesa ra në rrugë”, tha një shitës ushqimor lokal për AFP.
“Duhet të jemi të përgatitur që të kemi viktima në këtë tragjedi të tmerrshme,” u tha gazetarëve në vendngjarje në lagjen qendrore La Plaine, kryebashkiaku i Marsejës, Benoît Payan, ku më shumë se 100 zjarrfikës ende po merrnin nën kontroll zjarrin.
Ministri i Brendshëm, Gerald Darmanin, tha se kishte nga katër deri në 10 persona të bllokuar nën rrënoja. “Ne nuk e dimë nëse ata janë gjallë apo të vdekur,” u tha ai gazetarëve, duke shtuar se autoritetet nuk kishin zbuluar ende shkakun e “shpërthimit aq shumë të madh” që shkaktoi shembjen.
Pesë persona u plagosën në ndërtesat fqinje që u dëmtuan nga shembja dhe 33 të tjerë u transportuan në spital.
Është e paqartë se sa njerëz ishin brenda bllokut të shembur – që besohet se kishte një apartament në çdo kat. “Jo të gjithë njerëzit që supozohet se ishin brenda ndërtesës janë parë, familjet janë të shqetësuara”, tha ministri francez i strehimit, Olivier Klein, për transmetuesin Franceinfo.
Zjarri dhe djegia e ndërtesës i ka penguar ekipet e qenve të kërkojnë për të mbijetuar nën rrënoja./Opinion.al
