Agron Shehaj, kandidat për kreun e Partisë Demokratike në zgjedhjet e 13 Qershorit e ka cilësuar dështim të kryetarit Basha humbjen e zgjedhjeve të 25 Prillit.
Në një takim me demokratë të njësisë numër 9 në Tiranë, ndërsa prezantoi platformën e tij për drejtimin e partisë, Shehaj e cilësoi justifikim, artikulimin e Bashës për një masakër elektorale. Duke vijuar në këtë argument, Shehaj tha se nëse do të ishte kështu, PD nuk duhej të hyjë në parlament.
“Basha ju premtoi se do e rrëzonte Ramën, në fillim me protesta, bojkot dhe në fund me zgjedhje. Dështoi, por prap nuk do ta lëshojë karrigen, e ka drejtuar partinë si ka dashur vetë dhe prap nuk do të marrë përgjegjësi, sot po justifikohet se zgjedhjet nuk i ka humbur, por kanë qenë një masakër elektorale. Ka pasur vjedhje të votave, por nëse mendojmë se kjo është e vetmja arsye, atëherë si mundet që të njohim zgjedhjet dhe të futemi në parlament, si mund të shkojmë në zgjedhjet e reja. Kush është i bindur që arsyeja e vetme që kemi humbur është blerja masive e votave nuk mund të futet në parlament, por t’u bëjë thirrje demokratëve që parlamenti të mos ngrihet. Jam i bindur që ka pasur blerje masive të votave, por një nga problemet kryesore gjatë opozitës, ishte djegia e mandateve”, tha Shehaj./Opinion.al
