Ish- deputeti i PD, Agron Shehaj shkruan se projekti Milot – Fier është një skemë e sofistikuar mashtrimi ku do të vidhen qindra milionë euro.
Shehaj merr shkas nga deklarata e Ministres Balluku në Kuvend e cila tha se opozita në 12 vite në krye të Ministrisë së Infrastrukturës nuk ka bërë sa ç’ka bërë Damian Gjiknuri në 14 muaj dhe ajo vetë në 18 muaj.
Përfaqësuesi i PD, kujton skandalin me DH Albania në projektin e Uazës së Re duke e quajtur një “kryevepër” të ish-ministrit Gjiknuri.
Më tej ai shton se rruga Milot- Fier është një garë e paracaktuar, dhe nga 115 kilometra që do të jepet koncesioni, 62 janë ekzistuese.
Sipas Shehajt, të përfshirët në këtë aferë korruptive do të përfitojnë 2 miliardë e 415 milionë euro në 35 vite. Ose 69 milionë euro në vit, 5.75 milionë euro në muaj, 192 mijë euro në ditë, 8 mijë euro në orë, 133 euro në minutë.
Ai e krahason këtë skemë vjedhjeje me atë të DH Albania tek Unaza e Re.
“Shumë prej projekteve të qeverisë Rama kanë patur vetëm një qëlim: vjedhjen dhe jo interesin publik. Skema e DH Albania ishte skemë për të vjedhur dhe pastuar paratë, që mbeti pa asnjë dënim, sepse hajduti ishte vetë Rama. Edhe Milot-Fier është një skemë e sofistikuar mashtrimi ku do të vidhen qindra milionë euro direkt nga Edi Rama. Vjedhja e shqiptarëve duhet të ndalet, Rama duhet të largohet.”, shkruan Shehaj. /Opinion.al
