Vasillaq Sota është një ofier karriere. Ai sot mban detyrën e shefit të RENEA-s ndërsa më herët është dekoruar nga drejtori i policisë, Haki Çako. Emri i tij doli në skenë dje kur u arrestua nipi i i tij Orest Sota, të cilit iu gjetën 863 mijë euro dhe tre patentat, dy të Saimir Tahirit dhe një e gruas së tij.
Komandanti i RENEA, Vasillaq Sota në një reagim për mediat thotë se pas arrestimit të nipit, kjo çështje po kthehet në sulm ndaj tij.
“S’mund të merremi akoma me histori persekutimi se ka një dajë ballist e një xhaxha partizan. Secili mban përgjegjësi për veprimet e veta dhe përgjegjësinë le ta mbajë nipi për çfarë ka kryer. Unë gradën në polici e kam marrë me gjak dhe s’ma ka dhënë nipi”, është shprehur Sota.
I pyetur nëse është informuar nga kolegët e tij për arrestimin e nipit, komandanti i RENEA-s ka pohuar se askush nuk e ka informuar.
Sota është emëruar në krye të RENEA-s dy muaj më parë dhe jo në kohën kur Ministria e Brendshme drejtohej nga Tahiri.
