Drejtori i Agjencisë Qendrore të Inteligjencës në Shtetet e Bashkuara , William Burns, është takuar në Moskë me zyrtarin e sigurisë ruse, Nikolai Patrushev, udhëheqës i Këshillit të Sigurisë.
Në një deklaratë për mediat të ambasadës amerikane në Moskë thuhet se në këtë takim është diskutuar lidhur mes marrëdhënieve mes Rusisë dhe SHBA.
“Drejtori i CIA-s, William Burns, me kërkesë të presidentit, është duke udhëhequr një delegacion të zyrtarëve të lartë amerikanë në Moskë më 2 dhe 3 nëntor. Ata janë duke takuar me pjesëtarë të Qeverisë ruse për të diskutuar për disa çështje në marrëdhëniet bilaterale”,-ka thënë ambasada amerikane në Moskë.
Marrëdhëniet e Rusisë me Shtetet e Bashkuara janë në nivelet më të ulëta, kryesisht për shkak të ndërhyrjes së Rusisë në zgjedhjet amerikane, aneksimin e Gadishullit ukrainas të Krimesë nga Moska, konfliktet në lindje të Ukrainës, sulmet kibernetike që dyshohet se i kanë kryer hakerët rusë dhe helmimin e kritikut të Kremlinit, Aleksei Navalny.
Presidenti amerikan, Joe Biden, ka thënë se pavarësisht tensioneve, administrata e tij është duke kërkuar për mënyra të bashkëpunimit me Moskën për çështje specifike, siç janë zvogëlimi i armëve strategjike, bisedimet me Iranin për armë bërthamore dhe luftimin e sulmeve kibernetike.
