Shefi i CIA-s ka hedhur poshtë çdo spekulim që pretendon se presidenti rus, Vladimir Putin mund të jetë sëmurë.
“Nuk ka asnjë informacion se Vladimir Putin është në gjendje të keqe shëndetësore”, tha drejtori i CIA-s.
Ka pasur spekulime në rritje dhe të pakonfirmuara mediatike se Putini, i cili mbush 70-vjeç këtë vit, mund të vuante nga sëmundje të rënda, ndoshta dhe kanceri.
Por, William Burns u shpreh se nuk kishte prova për ta vërtetuar këtë, duke bërë shaka se ai dukej “shumë i shëndetshëm”.
“Ka shumë thashetheme për shëndetin e Presidentit Putin dhe me sa mund të themi është se ai është plotësisht shumë i shëndetshëm”, tha Burns në Forumin e Sigurisë Aspen në Kolorado.
Ndër të tjera, ai shtoi se ky nuk ishte një gjykim zyrtar i inteligjencës.
William Burns, i cili shërbeu si ambasador në Moskë tha se kishte vëzhguar liderin rus për më shumë se dy dekada.
“Putin është një besimtar i madh në kontrollin, frikësimin dhe barazimin, dhe këto tipare janë ngurtësuar gjatë dekadës së fundit pasi rrethi i tij i këshilltarëve është tkurrur”, tha shefi i CIA-s.
“Ai është i bindur se fati i tij si udhëheqës i Rusisë është ta rivendosë Rusinë si fuqi të madhe. Ai beson se çelësi për ta bërë këtë është të rikrijojë një sferë ndikimi në fqinjësinë e Rusisë dhe ai nuk mund ta bëjë këtë pa kontrolluar Ukrainën”.
Komentet e tij erdhën pasi SHBA njoftoi se do t’i siguronte Ukrainës më shumë armë me rreze të gjatë. Ndërkohë, më herët Ministri i Jashtëm rus Sergei Lavrov tha se fokusi ushtarak i Rusisë në Ukrainë nuk ishte më “vetëm” lindja, ndërsa la të kuptohej se strategjia e Moskës kishte ndryshuar pasi Perëndimi furnizoi Ukrainën me armë të tilla./Opinion.al
