Plot 17 zyrtarë, mes tyre dy shefa policie, efektivë policie, inspektorë vendor apo përfaqësues të pushtetit lokal e ndërtues janë vënë në pranga të policisë së Durrësit.
Sipas Ministrisë së Brendshme, pas një hetimi disa mujor janë kryer këro arrestime, ndërsa akuzohen për shpërdorim detyre dhe “Ndërtim të paligjshëm, në bashkëpunim”.
“Shpërdorimi i detyrës dhe veprimtaria e kundraligjshme dyshohet se është shtrirë përgjatë vitit 2019 në vende dhe kohë të ndryshme. Veprimet dhe mos-veprimet e tyre konsistojnë në favorizime të ndërtimeve pa leje, falsifikime dokumentesh, fshehje dhe manipulim të ngjarjeve, pengimin e zbulimit të së vërtetës dhe fakteve kriminale, mos-raportime të ngjarjeve kriminale, mos evidentim të kallzimeve të shtetasve sipas detyrimeve ligjore etj”, njofton Ministria e Brendshme.
Këta persona në bashkëpunim me njëri-tjetrin dhe duke abuzuar me kompetencat e ushtrimit të detyrës, dyshohet se kishin krijuar një mekanizëm korruptiv me qëllim përfitimin edhe në vlera monetare, i cili ka mundësuar dhe sjellë si pasojë ndërtime të shumta të paligjshme si objekte banimi, magazina, objekte biznesi etj duke shmangur kështu zbatimin e legjislacionit në fushën urbanistike dhe sigurimit teknik të tyre./ Opinion.al
