Dhoma e Përfaqësuesve në SHBA ka miratuar një projekt-ligj për të kundërshtuar atë që e quan “ndalim arbitrar, torturë dhe ngacmim” të myslimanëve ujgurë në Kinë.
Projekt-ligji bën thirrje për “sanksione të shënjestruara” ndaj anëtarëve të qeverisë kineze dhe përmend sekretarin e Partisë Komuniste në rajonin autonom Xinjiang, Chen Quanguo.
Nga ana e saj, Ministria e Jashtme e Kinës reagoi ashpër, duke e cilësuar këtë veprim si “qëllimkeq”.
“Projekt-ligji për ujgurët shënon përpjekjen më të rëndësishme ndërkombëtare për të bërë presion ndaj Kinës mbi ndalimin masiv të tyre dhe minoriteteve të tjera myslimane”, raporton BBC.
Më 25 nëntor disa dokumente të klasifikuara, të bëra publike, tregojnë se si Kina kontrollon jetën e rreth tre milionë njerëzve, të internuar në kampe masive të paraburgimit, në rajonin Ksinjiang.
Ndërkaq qeveria kineze vazhdimisht ka pohuar se kampet në Ksinjiang, rajon i banuar me shumicë ujgure myslimane, ofrojnë arsim dhe aftësim vullnetar. Qeveria insiston se në këtë mënyrë i mban myslimanët larg ekstremizmit./Opinion.al
