Shtetet e Bashkuara njoftuan se kanë vrarë numrin 2 të Shtetit Islamik, Abdul Rahman Mustafa al – Qaduli. Përmes një konference për shtyp, Sekretari Amerikan i Mbrojtjes, Ashton Carter, deklaroi se vrasja e al-Qadulit, i cilësuar si Ministri i Financave të ISIS, do t’ia vështirësojë aktivitetin terrorist Shtetit Islamik.
Sekretari Carter nuk dha detaje nga operacioni për vrasjen e nr.2 të ISIS, por zyrtarë të lartë amerikanë raportuan për rrjetin NBC News se al-Qaduli u ekzekutua mëngjesin e së enjtes në një operacion blic të forcave speciale amerikane në Siri.
Fillimisht misioni ishte që i ashtuquajturi Ministri i Financave i ISIS, të kapej i gjallë, por situata u përshkallëzua dhe terroristi së bashku me 3 persona të tjerë u vranë. Për kokën e Mustafa al – Qadulit ishte vënë një shpërblim prej 7 milionë dollarësh, shifra e dytë më e lartë pas asaj për Kreun e ISIS, Abu Bakr al-Bagdadi prej 10 milionë dollarësh.
Sekretari Amerikan i Mbrojtes konfirmoi gjithashtu edhe ekzekutimin e gjeorgjianit Tarkhan Batirashvilit, i njohur ndryshe si Omar Shishani. Terroristi me mjekër të kuqe i cilësuar si “ministri i luftës” i Shtetit Islamik u vra më datë 4 Mars në një operacion ajror me dron.
Tv Klan
