Një skuadër me ekspertë të sigurisë kibernetike nga Shtetet e Bashkuara të Amerikës janë vendosur në Malin e Zi për të hartuar një strategji për të luftuar sulmet kibernetike ruse dhe të vendeve të tjera në prag të zgjedhjeve në SHBA dhe Mal të Zi në vitin 2020.
Associated Press raporton se “Ballkani është një zonë strategjike në të cilën Rusia është përpjekur të rivendosë ndikimin e saj historik” dhe shton se “Moska ishte kundër anëtarësimit të shtetit të vogël në NATO”.
Sipas tyre, Mali i zi është zgjedhur si bazë e luftës globale kibernetike për shkak të përpjekjes për grusht shteti të Rusisë atje në vitin 2016.
Ministri i Brendshëm, Predrag Boskovic, është treguar i kujdesshëm për të mos përmendur emra në lidhje me këto sulme megjithatë ka nënvizuar se lufta kibernetike është shumë e rëndësishme për të parandaluar rikthimin e kaosit të fillimit të viteve 1990.
“Amerikanët mund të mësojnë diçka nga ne për sa i përket rreziqeve të mundshme ndaj sistemeve dhe rrjeteve të tyre, sepse Mali i Zi ishte shembulli i vërtetë i një sulmi të gjithanshëm ndaj nesh para zgjedhjeve dhe futjes në NATO”, tha Boskovic.
Ai tregon për një rast ku nëpërmjet një e-maili ishte tentuar aksesi në të dhëna të klasifikuara në rrjet.
“Kur punonjësi hapi materialin bashkëngjitur, të gjithë kompjuterët në sistem u prekën dhe hakerat mund të lexonin të gjitha të dhënat dhe komunikimet brenda rrjetit”, tha Boskovic.
Megjithatë më pak diskrete ka qenë e ngarkuara me punë në ambasadën amerikane në Mal të Zi, Judy Kuo, e cila tha se tri media që veprojnë në tregun malazez, janë burime manipulimi, dezinformimi dhe të lidhura me qeverinë ruse.
Duke folur në një konferencë në Podgoricë ajo tha se të rinjtë dhe publiku i gjerë janë mjaft të ndjeshëm ndaj ‘fake news’ dhe llojeve të ndryshme të manipulimit nga ana e mediave.
“Kush është burimi i këtij informacioni për publikun malazezë? Mund të përmend disa kontribues kryesorë: ‘Sputnik’, i cili është direkt nën qeverinë ruse, portale në internet si ‘IN4S’ dhe ‘Borba’ të cilat janë të lidhura ngushtë me direktivat që vijnë nga Kremlini. Këto portale dhe disa ‘shtëpi mediale’ rajonale dhe lokale – nuk mendoj në ato që janë me të vërtetë media – janë mjaft aktive dhe shumë të koordinuara. Këto fushata kanë për qëllim të joshin publikun, të krijojnë rrëmujë dhe të krijojnë probleme në shoqëri dhe midis vendeve”, deklaroi ajo.
Diplomatja amerikane përmendi shembullin, kur mediat “me qëllim prezantuan histori të sajuara për krijimin e bazave të NATO-s në Mal të Zi duke pretenduar se Mali i Zi mori pajisjet ushtarake për t’i përdorur kundër Serbisë dhe Rusisë”.
“Sipas nesh, qëllimi i publikimit të gënjeshtrave të tilla, është të krijohet një klimë anti-NATO në Mal të Zi dhe ndasi mes njerëzve. Kjo është vetëm njëra anë e perspektivës së një fushate mirë të koordinuar, të udhëhequr nga Rusia, e cila gjithashtu përfshin mashtrimet kibernetike”, tha diplomatja Kuo. /Opinion.al
