Në disa qytete të Shteteve të Bashkuara vijojnë protestat e dhunshme për vrasjen e një afrikano-amerikani në Mineapolis të Minesotës.
Këtë të diel qindra njerëz mblodhën në një park pranë Shtëpisë së Bardhë në Uashington duke brohoritur: “jeta e afrikano-amerikanëve ka vlerë”, “duart lart, mos qëllo” dhe “pa drejtësi nuk ka paqe”.
Disa prej tyre hodhën shishe plastike deh sende të forta në drejtim të policisë. Po ashtu, protestuesit ndezën dy zjarre pranë parkut, ndërsa policia reagoi me gaz lotsjellës.
Në Nju Jork, u dogjën dy makina, ndërsa mijëra njerëz marshuan në lagje të ndryshme. Afrikano-amerikani, George Floyd, 46 vjeç, vdiq javën e kaluar, pasi u ndalua nga oficerët policorë – njëri prej të cilëve i vendosi gjurin në qafë duk i shkaktuar vdekjen.
Presidenti i Shteteve të Bashkuara, Donald Trump, e cilësoi vdekjen e Floydit si “tragjedi të rëndë” që e ka mbushur vendin me zemërim dhe pikëllim, por tha se administrata e tij nuk do të tolerojë që demonstratat të shndërrohen në dhunë.
Trazirat filluan në Mineapolis dhe u përhapën në të gjithë SHBA-në që nga vdekja e Floydit më 25 maj. Gjatë fundjavës, demonstrues në Kanada, Mbretëri të Bashkuar dhe Gjermani u mblodhën po ashtu për të shfaqur mbështetje për protestat.
