Bota

SHBA thirrje Evropës: Riatdhesoni luftëtarët e ISIS


               Publikuar në : 09:38 - 19/11/19 |
el ida

Shtetet e Bashkuara iu kanë ripërsëritur vendeve evropiane thirrjen që t’i riatdhesojnë qytetarët e tyre që kanë luftuar për grupin militant Shteti Islamik (ISIS).

Koordinatori kundër terrorizmit i Departamentit amerikan të Shtetit, Nathan Sales tha se rikthimi i luftëtarëve në shtëpi është mënyra më efektive për t’u marrë me ta.

“Ne të gjithë e kuptojmë nevojën për të qenë të ashpër ndaj terroristëve. Por, për të qenë të ashpër, ne mendojmë se ata duhet të ndiqen penalisht dhe të mbahen përgjegjës. Lënia e tyre në shkretëtirë nuk është zgjidhje efektive. Kjo i rrit gjasat që ata të gjejnë mënyra për t’u kthyer në fushëbetejë”, tha Sales në Bruksel, ku pritet të takojë disa zyrtarë të vendeve evropiane.

Vende, si Franca nuk e duan kthimin e shtetasve që i janë bashkuar Shtetit Islamik, madje disa qeveri evropiane, përfshirë Britaninë, u kanë marrë nënshtetësinë disa qytetarëve për shkak të lidhjeve të pretenduara me Shtetin Islamik. Sales paralajmëroi se kjo strategji përfshin rreziqe të mëdha.

“Ne nuk mendojmë se heqja e nënshtetësisë është një mjet i efektshëm kundër terrorizmit. Në vitet 1990, Arabia Saudite i hoqi nënshtetësinë Osama bin Ladenit. Kjo nuk e parandaloi 11 shtatorin”, tha Sales, duke iu referuar sulmeve të rrjetit terrorist Al Kaida në SHBA, më 11 shtator, 2001.

Ndërkaq, BE-ja nuk ka politikë për luftëtarët e huaj dhe secili nga 28 shtetet anëtare vendos vetë se si ta trajtojë këtë çështje./Opinion.al

Pas