Prokurorët amerikanë kanë akuzuar një anëtar të dyshuar të mafies japoneze për trafikim të materialeve bërthamore, shkruan BBC.
Takeshi Ebisawa, 60 vjeç, u përpoq të shiste uranium dhe plutonium që ai besonte se do të transferoheshin në Iran për të ndërtuar një bombë bërthamore.
Z.Ebisawa dhe një bashkëpunëtor tajlandez janë akuzuar më parë për armë dhe drogë në prill 2022.
Ai përballet me dënim me burgim të përjetshëm nëse shpallet fajtor për akuzat e fundit.
Autoritetet amerikane thonë se Ebisawa – i cili po mbahet në një burg në Bruklin – është një figurë e lartë në sindikatat japoneze të krimit të organizuar, të njohur si Yakuza, me operacione në Sri Lanka, Myanmar, Tajlandë dhe SHBA.
Departamenti Amerikan i Drejtësisë tha se zoti Ebisawa dhe “bashkëpunëtorët e tij i treguan mostra të materialeve bërthamore në Tajlandë” një agjenti të fshehtë nga Agjencia Amerikane e Zbatimit të Drogës (DEA).
Agjenti po paraqitej si një trafikant droge dhe armësh me lidhje me një gjeneral iranian.
Mostrat bërthamore – të cilat erdhën nga Mianmar – u kapën nga autoritetet tajlandeze dhe u transferuan te hetuesit amerikanë. Një laborator amerikan konfirmoi se materiali përmbante uranium dhe plutonium të shkallës së armëve.
Prokurorët gjithashtu pretendojnë se Ebisawa kërkoi të merrte sasi të mëdha armësh të nivelit ushtarak në emër të një grupi rebel të paspecifikuar në Mianmar.
Armët përfshinin raketa tokë-ajër, pushkë sulmi dhe snajper, mitralozë, raketa të kalibrave të ndryshëm dhe një shumëllojshmëri mjetesh taktike.
