Një person i armatosur ka qëlluar dhe ka vrarë tetë persona në një qendër tregtare në veri të Dallas, Teksas.
Qindra njerëz u evakuuan nga qendra tregtare në qytetin Allen, pasi dëshmitarët thanë se një burrë po qëllonte pa ndalim drejt kalimtarëve.
Policia tha se e qëlluan për vdekje të armatosurin dhe besojnë se ai veproi i vetëm.
Sipas mediave të huaja mësohet se disa nga viktimat janë fëmijë. Të paktën shtatë persona po trajtohen në spital, tre prej të cilëve janë në gjendje të rëndë.
Shefi i zjarrfikësve të Allen, Jonathan Boyd, tha se shtatë persona, përfshirë autorin e vrasjeve, ndërruan jetë në vendngjarje dhe dy të tjerë vdiqën më vonë në spital.
Nga hetimet dyshohet se autori ka përdorur një pushkë të stilit AR-15 për të qëlluar kundrejt kalimtarëve.
Video nga vendi i ngjarjes tregoi njerëz që vraponin për t’u strehuar në një parking makinash, ndërsa shpërthyen një seri të shtënash.
Allen ka rreth 105,000 banorë dhe është 20 milje (32 km) në veri të Dallasit qendror.
Shumica e të rriturve të moshës 21 vjeç e lart në Teksas lejohen të mbajnë një pistoletë pa licencë, përveç nëse kanë një dënim të mëparshëm. Përveç kësaj, ka pak kufizime për posedimin e pushkëve dhe armëve gjahu.
Në SHBA deri më tani këtë vit ka pasur të paktën 198 raste sulmesh me të shtëna masive në të cilat katër ose më shumë njerëz u vranë dhe plagosur, sipas Arkivit të Dhunës me Armë./Opinion.al
