Kosova nuk ka pranuar thirrjet e ndërkombëtarëve për të shtyrë afatin e fundit për ndërrimin e targave.
Ka qenë vetë kryeministri i Kosovës Albin Kurti, i cili ka deklaruar se 31 tetori është data e fundit për të gjithë qytetarët e Kosovës që kanë automjete me targa KM, PR e të ngjashme, t’i konvertojnë ato në “RKS”.
Kurti nënvizoi se këto masa nuk janë as hakmarrje dhe as urrejtje ndaj serbëve.
“Data e fundit është 31 tetori, kur të gjithë qytetarët e Kosovës që kanë automjete me targa të stërvjetëruara KM, PR e të ngjashme, t’i konvertojnë ato në targa legjitime. Këto nuk janë masa kundër serbëve, përkundrazi këto janë masa për serbët që u ofrojnë lehtësime financiare dhe jemi të interesuar që të gjithë të jemi të barabartë”.
Këto deklarata të Kurtit erdhën pak orë pasi zëdhënësi i Departamentit amerikan të Shtetit, deklaroi se Uashingtoni shpreson që një marrëveshje për targat të arrihet së shpejti.
Ned Price, zëdhënës i Departamentit të Shtetit tha se si i dërguari i Uashingtonit për Ballkanin Perëndimor, Gabriel Escobar, por edhe sekretari i Shtetit, Antony Blinken, janë të angazhuar që Kosova dhe Serbia të zgjidhin mosmarrëveshjet.
Ne do të vazhdojmë të mbështesim dialogun e BE-së. Ne do të vazhdojmë të jemi partner si për Kosovën, ashtu edhe Serbinë, me shpresën që ata mund ta zgjidhin këtë çështje në mënyrë paqësore gjatë ditëve në vijim”, tha Price.
Zëdhënësi i DASH-it përsëriti se SHBA-ja mbështet dialogun për normalizimin e raporteve midis Kosovës dhe Serbisë, që ndërmjetësohet nga Bashkimi Evropian.
“Mesazhi ynë ka qenë i qëndrueshëm. Ne mbështesim plotësisht dialogun e lehtësuar nga BE-ja. Prandaj, i dërguari ynë për Ballkanin Perëndimor, Gabriel Escobar, ishte në Prishtinë dhe Beograd për të mbështetur këtë proces. Siç e dini, vetë sekretari amerikan i Shtetit, Antony Blinken ka qenë jashtëzakonisht i angazhuar në këtë çështje. Ai ka biseduar edhe me presidentin serb, Aleksandar] Vuçiq, edhe me kryeministrin kosovar, Albin Kurti, më herët gjatë këtij muaji. Ai theksoi mbështetjen tonë për dialogun midis Kosovës dhe Serbisë që lehtësohet nga BE-ja. Ai i inkurajoi palët që të vazhdojnë angazhimin konstruktiv për të siguruar paqe dhe stabilitet në mbarë rajonin”, tha Price.
