Ndihmës-komisionarja ekzekutive e këtij Departamenti, Brenda Smith, ka deklaruar se Shtetet e Bashkuara janë duke përgatitur urdhra për të bllokuar importin e pambukut dhe produkteve të domateve nga rajoni Ksinjiang i Kinës, pas pretendimeve se këto produkte janë prodhuar nga puna e detyrueshme.
Zyrtarja e Departamentit amerikan për Dogana dhe Mbrojtje Kufitare ka thënë për agjencinë e lajmeve Reuters se ndalesat në import do të përfshijnë të gjitha llojet e produkteve që janë me pambuk dhe domate nga ky rajon.
Një zëdhënës i këtij Departamenti ka thënë se njoftimi për këto masa është bërë më 8 shtator, por është shtyrë për më vonë gjatë kësaj jave për shkak të agjendave.
Këto veprime pritet të bëhen publike zyrtarisht nga Shtëpia e Bardhë, bashkë me pesë ndalesa tjera. Një vendim i tillë pritet të tensionojë edhe më shumë marrëdhëniet në mes të Shteteve të Bashkuara dhe Kinës. Kjo pasi Uashingtoni veçse ka rritur presionin ndaj Pekinit për trajtimin e myslimanëve.
Sekretari amerikan i Shtetit, Mike Pompeo ka thënë javën e kaluar se kompanitë amerikane “po bëhen të vetëdijshme” për abuzimet me të drejta të njeriut në provincën kineze, teksa ka bërë thirrje për rishqyrtim të mundësive të bërjes biznes atje.
Kina është kritikuar disa herë për vendosje të më shumë se 1 milion ujgurëve dhe anëtarëve tjerë të grupeve etnike myslimane në kampe të përqendrimit në Ksinjiang më 2017. Kina kanë thënë se kampet janë të nevojshme për riedukim, luftim të terrorizmit dhe ekstremizmit.
