Administrata e presidentit amerikan, Donald Trump, po monitoron veprimet e udhëheqësve të përkohshëm të Sirisë, teksa Uashingtoni po përcakton politikën e saj të ardhshme.
Kështu tha më 21 mars zëdhënësja e Departamentit amerikan të Shtetit, Tammy Bruce, duke lënë të kuptohet se nuk pritet ndonjë lehtësim i shpejtë i sanksioneve për Damaskun.
“Ne po monitorojmë në përgjithësi veprimet e autoriteteve të përkohshme siriane, për një sërë çështjesh, teksa ne po vendosim dhe po mendojmë për të ardhmen e politikës amerikane për Sirinë”, tha ajo gjatë një konference për media.
“Ne vazhdojmë të bëjmë thirrje për një qeveri gjithëpërfshirëse të udhëhequr nga civilët, e cila do të siguronte që institucionet kombëtare të ishin efektive, përgjegjëse dhe të përfaqësuara”, tha Bruce.
Deklaratat e saj ofrojnë një pasqyrë se çfarë po mendon administrata Trump sa i përket politikës për Sirinë, teksa administrata amerikane ka qenë përgjithësisht e heshtur për këtë çështje që kur Trump mori detyrën më 20 janar.
Çështja kryesore për Uashingtonin është nëse është e hapur që të heqë sanksionet amerikane ndaj Sirisë dhe si e sheh të ardhmen e trupave amerikane në veriperëndim të Sirisë.
Shumë shtete perëndimore vendosën një sërë sanksionesh ndaj Sirisë gjatë sundimit të Bashar al-Assadit, i cili u rrëzua nga pushteti vitin e kaluar nga grupet rebele të udhëhequra nga islamistët e Hayat Tahrir al-Sham (HTS), që më herët kishin qenë të lidhur me Al-Kaidën.
Kur u pyet nëse SHBA-ja po e shqyrton mundësinë e lehtësimit të sanksioneve për Sirinë, Bruce tha:
“Dinamika nuk ka ndryshuar dhe asnjë plan nuk ka ndryshuar deri më tani”.
Figura të HTS-ja tashmë kanë marrë pushtetin në Siri. Ky grup vazhdon të konsiderohet entitet terrorist nga SHBA-ja, teksa udhëheqësi i HTS-së, Ahmed Sharaa aktualisht mban postin e presidentit të përkohshëm të Sirisë.
HTS-ja zyrtarisht u shpërbë në muajin janar, teksa sanksionet vazhdojnë të paraqesin një pengesë të madhe për Sharaan.
Kombet e Bashkuara kanë thënë se nëntë nga dhjetë sirianë jetojnë në varfëri, në shtetin që ka përjetuar shkatërrime të mëdha si pasojë e luftës civile që kishte shpërthyer më 2011./rel
