Zv/Ndihmës Sekretari i Shtetit, për Evropën Jugore dhe Qëndrore, Gabriel Escobar në një intervistë për Zërin e Amerikës ka komentuar vendimin e Sekretarit të Shtetit Blinken, Antony Blinken, për shpalljen “non grata” të ish-Kryeministrit Sali Berisha.
Ai ka deklaruar se vonesa për shpalljen e Berishës “non grata” 8 vite pas largimit të tij nga pushteti erdhi për shkak të procedurave të verifikimit të informacionit.
“Ka disa arsye, e para, kemi kompetenca të reja. Pastaj, gjatë asaj periudhe, duhej bërë hulumtimi dhe duhej të siguroheshim, që jemi në gjendje të bëjmë përpunimin e informacionit”, tha Eskobar.
Ndër të tjera, Eskobar ka paralajmëruar se ky nuk do jetë rasti i vetëm, jo vetëm në Shqipëri por në gjithë Ballkanin.
“Do të shihni përcaktime të tjera për të gjithë rajonin. Nuk mund të komentoj për raste të veçanta. Por ne synojmë t’i përdorim kompetencat, për qëllimin që ato u krijuan”, tha Eskobar.
