Autoritetet në Shtetet e Bashkuara kanë paralajmëruar për rrezikun e një sulmi të organizuar terrorist të ngjashëm me atë që ndodhi në Rusi, ku mbetën të vrarë qindra persona.
Alarmi është dhënë nga drejtori I FBI-së, Christopher Wray përpara një paneli të Dhomës së Përfaqësuesve në seancën dëgjimore për buxhetin
Christopher Wray, drejtor i FBI: Kemi një shqetësim në rritje për mundësinë e një sulmi të koordinuar në vendin tonë, të ngjashëm me atë që ISIS-K kreu në një sallë koncertesh në Rusi, disa javë më parë.
Zyrtarët amerikanë prej kohësh kanë qenë të shqetësuar për mundësinë e një sulmi të kryer nga një individ apo grup i vogël i frymëzuar nga lufta midis Izraelit dhe Hamasit në Gaza.
Drejtori i FBI-së kërkoi shtim të fondeve për të rritur aftësitë gjurmuese të agjencisë që ai drejton, përballë kërcënimeve terroriste.
Zbulimi amerikan ishte i saktë në parashikimin e sulmit terrorist në afërsi të Moskës.
Por paralajmërimi i tyre dhe nga vendet e tjera ra në vesh të shurdhët, pasi autoritetet ruse nuk e morën parasysh për shkak të armiqësive në rritje mes dy fuqive botërore prej luftës në Ukrainë.
