Hondurasi ka nënshkruar një marrëveshje me Shtetet e Bashkuara, sipas së cilës Amerika mund të dëbojë atje azilkërkuesit që kanë kaluar përmes Hondurasit në kufirin jugor të SHBA-së.
Kritikët e kanë gjykuar vendimin, duke thënë se Hondurasi, që njihet për shkallë të lartë të vrasjeve, nuk është vendi i duhur për të dërguar njerëzit që largohen nga dhuna dhe varfëria.
Shtetet e Bashkuara kanë tentuar vazhdimisht të nënshkruajnë marrëveshje “me vendet e treta”, përmes së cilave mund të dërgojnë atje azilkërkuesit që kalojnë nëpër këto vende, në rrugën e tyre drejt SHBA-së. Deri më tani, marrëveshje të ngjashme janë nënshkruar me Guatemalan dhe El Salvadorin.
Ndërkaq presidenti amerikan, Donald Trump e ka kthyer në prioritet zvogëlimin e numrit të migrantëve që kalojnë kufirin në mes të SHBA-së dhe Meksikës.
Më herët gjatë këtij muaji, Gjykata Supreme në SHBA ka lejuar qeverinë që të ndalojë hyrjen e njerëzve në tokën amerikane nëse ata kanë dështuar të sigurojnë azil në ndonjë prej shteteve që kanë kaluar teksa janë nisur në SHBA.
Deri në fund të muajit gusht, rreth 811,016 persona janë ndaluar në kufirin jug-perëndimor të SHBA-së, ndërsa gati 590,000 kanë qenë nga El Salvadori, Guatemala dhe Hondurasi. Shumica prej tyre kanë arritur në kufi me të paktën një anëtar të familjes./Opinion.al
