I vetëquajtuar John Earnest, një 19-vjeçar hapi zjarr në një sinagogë të Kalifornisë gjatë së shtunës, duke shkaktuar një viktimë dhe tre të plagosur.
Në sinagogë po kremtohej mesha e Pashkës, kur agresori i armatosur kreu aktin ekstrem. Edhe pse i riu u arrestua në Poway, në veri të qytetit të San Diegos, policia ende nuk ka dhënë një motiv të ngjarjes, ndërsa presidenti Donald Trump e cilësoi sulmin si “një krim urrejtjeje”.
Burime nga policia në San Diego bënë me dije për mediat se, hetuesit janë duke rishikuar mediat sociale të të dyshuarit, ndërkohë që po ekzaminojnë edhe një “letër të hapur” antisemite të publikuar “online”.
Në këtë letër, të publikuar në një forum online disa orë përpara sulmit, autori , thoshte se ishte frymëzuar nga sulmi në dy xhamitë e Christchurchit të muajit të kaluar, e po ashtu edhe nga të shtënat vdekjeprurëse në sinagogën “Pema e jetës” në Pittsburg.
Sulmi në San Diego vjen ekzaktësisht 6 muaj pas të shtënave në Pittsburg, në tetor të vitit 2018, kur mbetën të vdekur 11 persona, në atë që u konsiderua asokohe si sulmi më i rëndë antisemit në historinë e viteve të fundit të Shteteve të Bashkuara, dhe pak kohë pas sulmit në xhamitë e Zelandës së Re./Opinion.al
