Shtetet e Bashkuara të Amerikës kanë miratuar dozën shtesë të vaksinës kundër koronavirusit.
Kjo dozë do t’iu injektohet personave me sistem të dobët imunitar, duke besuar se kjo dozë i mbron ata më mirë.
Njoftimi i Administratës amerikane për Ushqim dhe Ilaçe është dhënë më 12 gusht, për vaksinat e kompanive Pfizer dhe Moderna, dhe vlen për miliona amerikanë që janë më të rrezikuar nga Covid-19 për shkak të transplantit të organeve, kancereve të ndryshme dhe problemeve tjera shëndetësore.
“Përmes këtij hapi synojmë të sigurojmë që më të ndjeshmit të janë më të mbrojtur kundër koronavirusit”, ka thënë Rochelle Walensky, drejtore e Qendrave për Parandalimin dhe Kontrollin e Sëmundjeve (CDC).
Miratimi i dozës shtesë do të vlejë për rreth 3 për qind të të rriturve amerikanë dhe nuk është thirrje për popullsinë e përgjithshme që të marrë një dozë përforcuese.
Zyrtarët amerikanë për shëndetësi vazhdojnë të monitorojnë nëse imuniteti i krijuar nga vaksina dobësohet mjaftueshëm që të jetë e nevojshme një dozë shtesë për secilin.
Ky vendim vjen në kohën kur varianti Delta i koronavirusit vazhdon të përhapet në botë.
Edhe shtete të tjera përfshirë Francën dhe Izraelin, kanë bërë rekomandime të ngjashme për popujt e tyre.
