Numri i rasteve me koronavirus në të gjithë Shtetet e Bashkuara ka kaluar 2.5 milionë, teksa Florida dhe Teksasi kanë raportuar një numër rekord të infektuarish.
Rritja e rasteve në shtetet jugore vjen pasi bizneset u lejuan të rihapeshin javët e fundit.
Të shtunën, Florida raportoi më shumë se 9,500 raste të reja, nga gati 9,000 të premten që ishte rekordi i mëparshëm.
Rritja ka bërë që zyrtarët e shtetit të shtrëngojnë sërish kufizimet në biznes – siç bëri Teksasi të premten.
Numri i përgjithshëm i rasteve në Florida është mbi 132,000 dhe më shumë se 3,300 të sëmurë me Covid-19 kanë vdekur.
Në Teksas, i cili gjithashtu ka parë numrin rekord të rasteve këtë javë, Guvernatori Greg Abbott u tha bareve të mbyllnin dhe të kufizonin kapacitetet e brendshme të restoranteve në 50%.
Të Shtunën, Universiteti Johns Hopkins tha që numri i përgjithshëm i rasteve në SHBA ishte 2.505.593.
Zyrtarët e shëndetësisë vlerësojnë se numri i vërtetë i rasteve ka të ngjarë të jetë 10 herë më i lartë se totali i konfirmuar. Qendrat e SHBA për Kontrollin e Sëmundjeve (CDC) thanë që deri në 20 milion amerikanë mund të jenë infektuar.
Rritja e rasteve po nxitet nga të rinjtë – ata të moshës 18 deri 34 vjeç – duke rezultuar pozitivë, veçanërisht në jug dhe perëndim të SHBA, tha kreu i CDC, Dr Robert Redfield.
Këshilltari kryesor i qeverisë amerikane për koronavirusin, Dr Anthony Fauci, tha javën e kaluar se vendi kishte një “problem serioz”.
Më shumë se 125,000 persona të sëmurë me Covid-19 kanë vdekur në të gjithë vendin – më shumë se në çdo vend tjetër./ Opinion.al
