Nëse vaksina kundër COVID-19 ju shkakton probleme apo efekte anësore të rënda, atëherë të paktën brenda territorit të SHBA-ve nuk mund të padisni kompaninë prodhuese.
“Kur qeveria thotë që e do vaksinën katër apo pesë herë më shpejt sesa bëhet normalisht një vaksinë, atëherë me shumë gjasa kompanitë kanë kërkuar që të kenë mbrojtje nga paditë miliona dollarëshe”, tha juristi Rogge Dunn.
Qeveria federale i ka garantuar imunitet të plotë dy kompanive, Pfizer dhe Moderna, nëse diçka shkon keq me vaksinën në mënyrë të paqëllimshme, kështu shkruan një lajm i publikuar nga rrjeti amerikan CNBC.
“Është shumë e rrallë që imuniteti i plotë të miratohet. Kompanitë farmaceutike normalisht nuk marrin kaq shumë mbrojtje ligjore.”-tha Dunn për CNBC.
Shtetasit amerikanë, gjithashtu nuk do të kenë mundësi as të padisin Administratën e Ushqimeve dhe Ilaçeve, për autorizimin e përdorimit emergjent të vaksinës.
Masa ligjore është miratuar që në shkurt nga Sekretari i Shëndetësisë, Alex Azar, duke u mbështetur në një ligj të vitit 2005, ku u sigurohet imunitet kompanive që shpërndajnë mjekime kritike, përveç rasteve ku ka shkelje apo gabime të qëllimshme./Opinion.al
