Pas më shumë se 20 vitesh burg në Shtetet e Bashkuara, Ana Montes, një nga spiunet më të njohura të Luftës së Ftohtë, është liruar nga burgu, sikurse raporton BBC.
65-vjeçarja spiunoi për Kubën për më shumë se dy dekada ndërsa punonte si analiste në Agjencinë e Inteligjencës së Mbrojtjes së SHBA. Pas arrestimit të saj në vitin 2001, administrata amerikane deklaroi se ajo i kishte zbuluar Havanës pothuajse të gjitha operacionet e inteligjencës amerikane në ishull dhe për këtë arsye konsiderohej një nga “spiunët më të dëmshëm” për sigurinë amerikane.
Michelle Van Cleave, e cila drejtoi kundërzbulimin nën Presidentin George W. Bush, i tha Kongresit në vitin 2012 se Montes kishte “kompromentuar pothuajse gjithçka që dinim për Kubën dhe operacionet tona në ishull dhe qeveria në Havana mund të përdorte të gjithë informacionin në avantazhin e saj”.
Pas arrestimit të saj, Montes u akuzua, ndër të tjera, për zbulimin e identitetit të katër spiunëve amerikanë dhe sigurimin e materialeve të klasifikuara dhe u dënua me 25 vjet burg. Ndryshe nga spiunët e tjerë, megjithatë, Montes kishte vendosur të punonte për Kubën pasi ishte afruar me një studente në Universitetin e saj Johns Hopkins në 1984, për një arsye ideologjike, kundërshtimin e saj ndaj politikave të Presidentit të atëhershëm Ronald Reagan./Opinion.al
