Shefja për të drejta të njeriut e Kombeve të Bashkuara, Michelle Bachelet, tha se është “e tmerruar” nga kushtet me të cilat përballen migrantët e ndaluar në Shtetet e Bashkuara.
Ajo tha se fëmijët nuk duhet të mbahen kurrë në objektet e migrantëve të ndaluar ose të ndahen nga familjet e tyre.
“Si një pediatre, por edhe si nënë dhe një ish-udhëheqëse e shtetit, jam thellësisht e tronditur që fëmijët janë të detyruar të flenë në dysheme, në objekte të mbipopulluara, pa akses në kujdesin shëndetësor ose ushqimin tw duhur dhe në kushte të dobëta sanitare”, tha përmes një deklarate Bachelet.
Më 6 korrik, gazetat New York Times dhe El Paso Times botuan një artikull që e përshkruante një stacion të Patrullës Kufitare në Klint të Teksasit, të mbushur me qindra fëmijë të veshur me rroba të pista dhe të paketuar në qeli.
Presidenti i Shteteve të Bashkuara, Donald Trump, tha se artikulli është “mashtrim” dhe se ai do t’i dërgojë mediat për të vizituar qendrat.
Bachelet bëri thirrje për dhembshuri, duke thënë se ata që e gjejnë veten në këto ambiente “kanë bërë udhëtime të rrezikshme me fëmijët e tyre, në kërkim të mbrojtjes dhe dinjitetit dhe larg dhunës dhe urisë”./REL/
