Sekretari amerikan i Shtetit, Mike Pompeo, tha se Shtetet e Bashkuara e mbështesin të drejtën e Arabisë Saudite për të mbrojtur veten dhe se Uashingtoni nuk do ta tolerojë sjelljen kërcënuese të Iranit.
Pompeo i bëri këto komente në Twitter pas takimit në Riad me princin saudit të kurorës, Mohammed bin Salman.
Tensionet në rajon janë rritur edhe më shumë që nga sulmi i 14 shtatorit në kompleksin më të madh të prodhimit të naftës në Arabinë Saudite. Përgjegjësinë për këtë sulm e kanë marrë militantët Huthi në Jemen, të cilët janë të lidhur me Iranin.
Nga ana tjetër, Uashingtoni dhe Riadi kanë fajësuar drejtpërdrejt Iranin. Të mërkurën, Arabia Saudite ka paraqitur disa pjesë të raketave dhe dronëve, që tha se tregojnë se sulmi “është sponsorizuar padyshim nga Irani”.
Presidenti i Shteteve të Bashkuara, Donald Trump, tha se disa opsione, përfshirë luftën, janë në dispozicion si përgjigje. Trump po ashtu tha ka urdhëruar Thesarin amerikan që të rrisë sanksionet ndaj Iranit./Opinion.al
