Autoritetet amerikane kanë konfiskuar një anije mallrash koreanoveriore për shkelje të sanksioneve amerikane dhe atyre të OKB-së, pasi eksportonte qymyrgur.
Një divizion i Sigurisë Kombëtare i Departamentit amerikan të Drejtësisë nëpërmjet një deklarate bëri me dije se anija ishte duke iu afruar ujrave amerikane, duke nënvizuar se e njëjta anije është konfiskuar njëherë në prill të vitit 2018, nga autoritetet detare të Indonezisë.
Anija, e njohur me emërtimin “Wise Honest”, konsiderohet ndër anijet më të mëdha të transportit të Koresë së Veriut, ndërsa kjo shënon herën e parë që Shtetet e Bashkuara konfiskojnë një anije koreanoveriore për shkelje të sanksioneve.
Monitoruesit e OKB-së thanë se kur kjo anije u konfiskua vitin e kaluar, ajo po transportonte 25 mijë tonë qymyrguri me një vlerë prej rreth 3 milionë dollarësh, ndërsa në të kaluarën, Koreja e Veriut e ka përdorur këtë anije edhe për të transportuar makineri të rënda./Opinion.al
