Sekretari amerikan i Shtetit, Mike Pompeo i ka kërkuar Rusisë “të largohet” nga Venezuela, ndërsa në krahun tjetër homologu i tij rus, Sergei Lavrov, i ka bërë thirrje Uashingtonit që të “braktisë planet e tij të papërgjegjshme”.
“Rusët duhet të largohen. Unë do të takohem me ministrin e Jashtëm Lavrov në ditët në vijim. Është shumë e qartë, ne duam rusët që të largohen ashtu sikurse, ranianët, dhe përfaqësuesit e Kubës. Është shumë e qartë”, ka thënë Pompeo për televizionin ABC.
Ndërkohë, Lavrov ka akuzuar Shtetet e Bashkuara se janë duke udhëhequr një “fushatë të pashembullt” për të larguar nga pushteti “autoritetet legjitime të Venezuelës”.
Duke folur para një takimi në Moskë me ministrin e Jashtëm të Venezuelës, Jorge Arreaza, Lavrov ka thënë se iu takon vetëm banorëve të Venezuelës që të vendosin për të ardhmen e tyre.
Pompeo dhe Lavrov i kanë bërë këto deklarata para takimit të tyre të planifikuar këtë javë në Finlandë, në një kohë kur tensionet mes të Moskës dhe Uashingtonit, janë rritur ndjeshëm lidhur me situatën në Venezuelë.
Lideri opozitar në Venezuelë, Juan Guaido, e ka shpallur veten president të përkohshëm në muajin janar. Si lider i Asamblesë Kombëtare, ai është thirrur në Kushtetutë për të marrë këtë vendim, pasi ka konsideruar se mandati i ri i presidentit të kontestuar, Nicolas Maduro nuk është legjitim. Ai gëzon përkrahjen e më shumë se 50 shteteve, duke përfshirë Shtetet e Bashkuara.
Ndërsa Maduro nuk pranon të largohet nga posti i presindetit, ndërsa përkrahet nga shtete si Rusia, Irani, Kina dhe Kuba. Moska, e cila ka lidhje të rëndësishme ekonomike me qeverinë e Maduros, ka dërguar aeroplanë me ushtarë në Venezuelë.
Pakënaqësitë në Venezuelë janë rezultat i situatës së rëndë ekonomike, dhe mungesës së gjërave elementare për jetesë si ushqimi dhe uji./Opinion.al
