Përhapja e virusit vdekjeprurës përtej kufijve të Kinës, me shpejtësi të madhe, ka detyruar shumë vende të botës të marrin masa të forta për të mos lejuar koronavirusin të kthehet në një pandemi. Kështu, shumë vende kanë nisur eksperimentimin për një vaksinë kundër Covid-19, dhe pas Asutralisë dhe SHBA-ja ka gati pakon e parë.
Një kompani amerikane njoftoi se kishte dërguar pakon e parë të vaksinës eksperimentale mRna-1273 tek Instituti Kombëtar i Alergjive dhe Sëmundjeve Infektive. Eksperimenti klinik pritet të nisë me 20 ose 25 vullnetarë, në fund të muajit prill, siç raportojnë mediat amerikane, ndërsa rezultatet e para do të jenë gati mes korrikut dhe gushtit.
Vaksina bazohet në një prej teknologjive më të avancuara të disponueshme, e cila shfrytëzon sekuencën e materialit gjenetik të koronavirusit, acidin ribonukleik.
Siç shpjegojnë krijuesit e saj, vaksina e re është e programuar për kodifikimin e proteinës komplekse S, e përdorur si shënjestër edhe për vaksinat kundër koronaviruseve të tjera, si MERS dhe SARS. Avantazhi i kësaj qasjeje është se lejon kufizimin e infeksionit për të stimuluar një përgjigje imunitare më të fuqishme.
Ndërkaq, një ekip studiuesish të Universitetit të Queensland në Australi kanë përfunduar eksperimentin në laborator të një vaksine, e cila do të nisë eksperimentin fillimisht tek kafshët.
Megjithatë, sipas ekspertëve shqetësues mbetet fakti që vaksinat duan kohën e eksperimentimit, pritjes së rezultateve, aprovimit dhe në fund prodhimit në masë. Sipas parashikimeve më optimiste, procesi kërkon së paku 4-6 muaj kohë, ndërkohë që koronavirusi përparon me shpejtësi të frikshme nga njëri shtet në tjetrin, duke shënuar viktima dhe mijëra të prekur./Opinion.al
