Departamenti amerikan i Shtetit konfirmoi se i ka ofruar miliona dollarë kapitenit të anijes iraniane, që është në qendër të një konflikti diplomatik.
Brian Hook, udhëheqës i Departamentit për Iranin, i ka nisur kërkesë kapitenit të anijes, Adrian Darya 1, që të lundrojë diku ku Shtetet e Bashkuara mund të marrin cisternën.
Cisterna Adrian Darya 1, e njohur dikur si Grace 1, u konfiskua në fillim të muajit korrik nga autoritetet e Gjibraltarit, me ndihmën e marinsave britanikë. Ajo u ndalua nën dyshimin se po bënte transportimin e naftës së papërpunuar në Siri, duke shkelur kështu sanksionet e Bashkimit Evropian.
Por, pavarsisht kërkeses amerikane për ta ndaluar Gjibraltari e liroi cisternën më 15 gusht. Shtetet e Bashkuara kanë lëshuar një urdhër për sekuestrimin e saj me arsyetimin se ka lidhje me trupat e Gardës Revolucionare të Iranit, të cilën Uashingtoni e ka përcaktuar si një organizatë terroriste.
Pas lirimit nga ana e Gjibraltarit, kishte informacione se cisterna ishte nisur drejt Greqisë dhe Turqisë por të dyja vendet mohuan se ajo do të ndalet në portet e tyre.
Ndërkaq cisterna, e cila transporton 2.1 milion fuçi të naftës së papërpunuar, dy ditë më parë fiku sistemin e gjurmimit, teksa ishte rreth 4.583 kilometra larg bregdetit të Libanit dhe Sirisë, duke ngritur dyshime se do të shkojë në Siri./Opinion.al
